|
加入娛樂圈十年的林峯，演而優則唱，於樂壇發展兩年已進軍紅館，將於本月十七、十八日一連兩晚在紅館舉行首個個人演唱會。在紅館開個唱是每個歌手的夢想，以前要有一定資歷的歌手才能在紅館開騷，但近年年輕一輩歌手包括側田、衛蘭等都實現心願，阿峯亦有幸成為其中一個幸運兒。外界有不少質疑的聲音，對阿峯火速在紅館開個唱並不看好，他大方地說：「我知道外界有好多這樣的聲音，不過我真的不曾介意，總知大家到時入場看便知道！」他又揚言不會邀請緋聞女友鍾嘉欣任嘉賓，不想將歌手與電視藝人的身份混淆。
阿峯自幼已喜歡唱歌，他的父母從小已經安排他學習單簧管、結他，在升讀中學後，還專程到內地，跟隨一級歌唱家學習聲樂，大學亦修讀音樂系，一早在唱歌和音樂方面扎好根基。當他推出第一張專輯時，外間反應甚佳，想不到他的歌聲如此令人受落，銷量亦達金唱片。唱歌公司立即籌備第二張唱片。原來他當初入行也是打算做歌手的。
峯：林峯 記：記者
記：你入行是不是打算做歌手，出唱片？為何之後卻加入無綫？
峯：係呀！其實我自細就好鍾意唱歌，父母都畀我上咗好多音樂班，仲幫我錄低細個時唱啲歌！有時都會攞出來播，自己聽番也覺得好得意。入行時真係打算做歌手，後來因為有機會便加入了無綫，之後便因為拍劇已佔去大部分時間，所以便沒時間去唱做歌手的事，點知之後都有機會唱主題曲。
記：你能夠在眾多小生中脫穎而出，成為首個在紅館開個唱的小生，會否感到壓力，外間都質疑你是否勝任？
峯：講真，沒有壓力是呃你的，其實當初我知道要在紅館開騷也嚇了一跳，我永遠唔會覺得自己已經Ready，我都問公司可唔可以遲啲？佢哋話之前啲歌Feedback唔錯，公司同TVB都話呢個Timing啱啱好，仲話如果你覺得自己未Ready，咁呢世都未Ready，咁唔通話唔得呀？壓力的確好大，但既然無綫同英皇咁信任我，我一定會盡全力。在紅館個騷是每一個歌手夢寐以求嘅，真係諗都無諗過自己可以咁快，永遠都覺得自己未夠，但去到呢刻已經唔係做唔做到嘅問題，係一定要做到，所以我就用有限時間強化自己，以最佳狀態去畀一班鍾意我哋人一場Good
Show，至於其他嘅就交畀啲專業人士去處理。依家講咩都無用，到時大家入場便知道，得唔得都要到時先講。
無諗過請鍾嘉欣做嘉賓
記：阿峯你同鍾嘉欣合作拍了《溏心風暴》及《家好月圓》兩套劇，被塑造成熒幕情侶，最近嘉欣又加入了樂壇，你處男開騷會否請緋聞女友嘉欣來做嘉賓？
峯：冇喎！其實我真係冇諗過請佢喎，加上嘉賓不是由我請的，之後有聽過唱片公司想請佢，不過佢好似無期，講真依家我作為一個歌手，真係唔想畀人好電視嘅感覺。如果成件事都要圍繞TVB，咁不如請晒所有TVB藝人上嚟啦！
記：最近你籌備個唱期間，仲要喺深圳拍劇，每次都要中、港兩地回來，會否覺得好辛苦，有沒有跟公司反應過？
峯：當然有啦！而且公司也知道，不過我也不理太多啦！總知自己做得幾多便幾多，相信他們也會有計劃。
記：今次個唱宣傳賣點是性感，會否擔心到時女歌迷會飛擒大咬？
峯：我以前差啲練到六口舊腹肌，嗰陣痛到伸唔直條腰，沖涼攞毛巾都舉唔起隻手，後來因為要開劇先停咗。嚟睇騷嘅都係女性，我都想同佢哋多啲互動，總之佢哋想點就點啦！ |